Қазақстандықтар әлеуметтік желілерде «КешYOU» тобының «алтын құрамының» уақытша қайта қауышуын жаппай талқылап жатыр. Бұл ерекше оқиға топтың 20 жылдығына арналған Алматыдағы мерейтойлық концертте орын алды.
Instagram және Threads қолданушылары концерттен түсірілген фото мен бейнематериалдарды бөлісіп, Жанар Дұғалова, Камшат Жолдыбаева және Айдана Меденованың бір сахнада қайта бас қосуын ешкім күтпегенін жазуда.
«Алтын құрамның сахнаға шығуы стадионды дүр сілкіндірді. Алайда ең әсерлі сәт одан кейін болды: көрермендер бір сәтке тыныштала қалды. Аренаға орнаған сол үнсіздік бәрін сөзсіз-ақ ұқтырды – патшайымдар өз тағына қайта оралды», –
деп жазды Threads желісінің қолданушысы maratkyzy3010.
Топ құрамының қайта оралуына «МузАРТ» тобының әншісі Сәкен Майғазиев те пікір білдірді.
«КешYOU тобының жанкүйерлер "Алтын құрам" деп айдар таққан алтын қыздарға деген халықтың қошеметі бір минутқа созылды!», –
деп жазды Майғазиев.
«Араға 12 жыл салып олар қайтадан бір сахнада өнер көрсетті. Бұл – халық сүйіп, әрдайым сүйіп өтетін нағыз “алтын құрам”», –
деп жазды Threads қолданушысы Elakaibaidar.
«Сіздер ұзақ уақыттан кейін үшеуіңіз қайта сахнаға оралдыңыздар, ал бүкіл стадион тек сіздердің есімдеріңізді ұрандатты! Жанар, Камшат және Айдана – мәңгілік», –
деп жазылған Cinnamonfizzz парақшасында.
Еске сала кетейік, 29 мамыр күні елдегі ең танымал қыздар тобына 20 жыл толуына орай үлкен мерейтойлық кеш өткен болатын.
Фото: Instagram
