Лепесоваға қатысты дау оның Динара Сатжанға бағытталған пікірлерінен кейін басталған. Кейін тележүргізуші полиция мен Экономикалық тергеп-тексеру департаментіне жүгінгенін мәлімдеді.
Ақтөбе облыстық Экономикалық тергеп-тексеру департаменті қазіргі таңда тексеру жұмыстары жүргізіліп жатқанын растады.
«Әзірге толық ақпарат жоқ, тиісті мониторинг жүргізіліп жатыр», –
деп хабарлады департаменттің баспасөз қызметі.
Ал Лепесова даудан кейін әлеуметтік желіде үн қатып, өзін Қазақстаннан ғана емес, көрші елдерден де қолдайтындар бар екенін айтты.
«Мені аналар, ер азаматтар, көрші мемлекеттердің тұрғындары қолдап жатыр. Менің жанайқайым ащы болды. Шындық та ащы. Міне, алдымда жылап отырған ана отыр. Отбасын бұзатын әйелдер көбейіп кетті. Адамдар қиындықтан өтіп, енді бақыт табамыз деп үміттенгенде, олардың күйеулерін басқа әйелдер алып кетеді. Бұл қаншалықты дұрыс? Тәртіп керек. Әрбір сөзім – халықтың жанайқайы», –
деді емші.
Бұған дейін Динара Сатжан емші Бағдагүл Лепесованың айтқан сөздерінен кейін полиция мен Экономикалық тергеп-тексеру департаментіне жүгінетінін мәлімдеген болатын. Тележүргізушінің айтуынша, Лепесова оны балағаттап, әдепсіз сөзбен атаған.
Сонымен қатар Сатжан емшінің ақылы қызметтерінің заңдылығы, ББҚ (биологиялық белсенді қоспалар) сатуы, «бата беру» қызметтері, түрлі сауықтыру тәжірибелері және салық төлеуі мәселелерін де жария түрде көтерді.
Фото: Instagram
