Ведомствоның мәліметінше, қазақстандық әйелдер ерлермен қатар әскери қызметтің түрлі бағыттарында табысты еңбек етіп, елдің қорғаныс қабілетін нығайтуға елеулі үлес қосып келеді.
Бүгінде Қазақстан Қарулы күштерінде шамамен 7 мың әйел әскери қызмет атқарады.
Олар тек дәрігер, психолог немесе заңгер ретінде ғана емес, сондай-ақ ұшқыш, мерген және арнайы мақсаттағы бөлімдердің жауынгері сияқты күрделі әскери мамандықтарды да игерген.
Қорғаныс министрлігінің дерегіне сәйкес, 7 мың әйелдің мыңға жуығы – офицерлер, ал 6 мыңнан астамы келісімшарт негізінде қызмет етеді. Сондай-ақ, 11 әскери қызметші басшылық лауазымдарды атқарады.
Әйелдер Қарулы күштердің барлық дерлік әскер түрлері мен тектерінде қызмет етеді. Олар медицина, психология, қаржы, құқық, байланыс, кадр қызметі, материалдық-техникалық қамтамасыз ету, іс жүргізу және ақпараттық технологиялар салаларында еңбек етеді.
Сонымен қатар көптеген әйелдер жауынгерлік мамандықтарды таңдап жүр. Олар жауынгерлік қамтамасыз ету бөлімдерінде қызмет атқарып, штаб офицері мен нұсқаушы міндеттерін орындайды, ұшқыш, мерген және арнайы мақсаттағы бөлімдердің әскери қызметшісі ретінде де жұмыс істейді.
Әйел әскери қызметшілер парашютпен секіреді, ұшқышсыз ұшу аппараттарын құрастырып, басқарады және армияның жауынгерлік әзірлігін қамтамасыз етуге бағытталған міндеттерді орындайды.
Қорғаныс министрлігінің мәліметінше, «Байланыс» мамандығы бойынша алғашқы әйел түлектер 2002 жылы Құрлық әскерлерінің Әскери институтын тәмамдаған. Олардың көпшілігі бүгінде әскери қызметін жалғастырып келеді, ал кейбірі полковник әскери атағына дейін көтерілген.
Сондай-ақ, 2023 жылдан бастап Талғат Бигелдинов атындағы Әуе қорғанысы күштерінің Әскери институты әскери-медициналық факультетке қыздарды қабылдай бастады. Оқуды аяқтаған түлектерге алғашқы офицерлік әскери атақ – лейтенант беріледі.
Министрлік Қазақстан заңнамасында әйелдерді мерзімді әскери қызметке міндетті түрде шақыру қарастырылмағанын еске салды. Қазіргі уақытта мұндай норманы енгізу мәселесі күн тәртібінде жоқ. Дегенмен әскери қызметке қызығушылық танытқан әйелдер жергілікті әскери басқару органдарына немесе тікелей әскери бөлімдерге жүгініп, келісімшарт бойынша қызметке орналаса алады.
Фото: gov.kz
