Мұндай адаммен қарым-қатынас әйел үшін ауыр салдарға әкелуі мүмкін: ол достарынан алыстап, мансап құру мүмкіндігінен айырылады, тәуелді әрі жалғыз күйге түседі. Сондықтан өз қауіпсіздігің үшін жаман мінез-құлықты дер кезінде танып, ондай адамдармен байланысты тоқтатуды үйрену маңызды.
1. Ол толық бағынуды талап етеді
Егер ер адам көлік сатып алу, демалысты жоспарлау сияқты маңызды шешімдердің бәрін өзі қабылдап, сенің пікіріңді елемесе немесе «Мен жақсырақ білемін», «Әйелдер бұны түсінбейді» деп кемсітсе — бұл дабыл белгісі.
Мұндай адамның жанында өзіңді ересек, тең құқылы серіктес емес, бала сияқты сезінуің мүмкін. Уақыт өте келе өз шешімдеріңе сенуден қалуың ықтимал.
2. Ол қаржың мен уақытыңды бақылауда ұстайды
Саған қанша ақша жұмсау керегін өзі шешіп, әр шығыныңды тексеріп, тіпті өз қажетіңе ақша жұмсауға тыйым сала ма? Бұл — құрметтің жоқтығын білдіреді. Оның мақсаты — сені қорғау емес, билігін нығайту.
Қаржылық тәуелсіздікке ұмтыл. Ол — теңдік пен еркіндіктің негізі. Ертең бостандығыңа қайта қол сұғылса, ештеңесіз қаламын деп қорықпай кетуге мүмкіндігің болуы керек.
3. Ол қос стандарт қолданады
Өзі кеш келуге, достарымен қыдыруға, басқалармен еркін сөйлесуге құқылы, ал саған болмай ма? «Еркектерге рұқсат, әйел адамның ұяты болуы тиіс» деген түсінік — бұл айла мен екіжүзділік.
Тең қарым-қатынаста құқық пен міндет те тең болуы тиіс. Достарыңнан, қызығушылықтарыңнан айырылып, оқшауланып қалмас үшін мұндай манипуляцияға қарсы тұру қажет.
4. Ол кемсітуді «әзіл» етіп көрсетеді
«Сен қандай икемсізсің!», «Әйел мен логика үйлеспейді» деген сөздерді жиі естисің бе? Көпшіліктің алдында ақылыңа, келбетіңе не жасыңа тиісіп, оны «жай әзіл» деп ақталса — бұл жасырын қорлау.
Егер мұндай қарым-қатынасты тоқтатпасаң, уақыт өте келе өзіңді шын мәнінде лайықсыз сезіне бастайсың. Өзіңе деген құрмет пен махаббатты күшейту — ең басты қорған.
5. Ол шекараң мен сезіміңді елемейді
«Маған бұл ұнамайды» деген сөзіңе «Қойшы, артық ойлама», «Тағы да әйелдік қылық» деп жауап бере ме? Бұл — сенің жеке кеңістігіңе қол сұғу және эмоцияларыңды жоққа шығару.
Үндемей төзу — мәселені шешпейді. Егер махаббат үшін үнемі құрметсіздікке көніп жүрсең, қарым-қатынасты қайта қарастыратын уақыт келгені.
6. Ол жетістіктеріңді жоққа шығарады
Қызметте өстің бе, кітап жаздың ба, не өзіңді дамыттың ба — бәрін «жай ғана сәттілік», «оны кез келген адам жасай алады» деп бағаласа, ол сенің табысыңды мойындамайды. Мұндай адамға тәуелді, әлсіз серіктес ыңғайлы.
Қандай жағдай болмасын, өз дамуыңды тоқтатпа. Егер қарым-қатынаста қолдау сезілмесе, оны жалғастырудың мәні жоқ.
Фото: Pexels
Дереккөз: HEROINE
