1. Сенің қабілеттерің
Жұмыстан шығып, мүлде басқа мамандыққа ауыспас бұрын, өзіңде қабілеттерің бар екенін анықтап алғаның маңызды. Себебі жаңа салада өзіңді көрсете алуың осыған тікелей байланысты.
Мүмкін сен математиканы жақсы түсінетін шығарсың, бағдарламалауды білетін боларсың немесе хат жібермес бұрын ондағы қателерді мұқият тексеретін әдетің бар шығар. Бұрынғы жұмыс орындарыңда қандай қабілеттерің үшін бағаланғаныңды және қай салаларда өзіңді сенімсіздеу сезінгеніңді ойлап көр.
Сонымен қатар осы уақытқа дейін жинаған білімің мен тәжірибең қай жаңа мамандықта пайдалы болуы мүмкін екенін де саралап көр. Бұл іздеу аясын тарылтып, мамандық ауыстыру мәселесіне саналы түрде қарауға көмектеседі.
2. Ықтимал жұмыс орындары
Мысалы, сен заңгерсің делік, бірақ аниматор болып жұмыс істеуді ойлап жүрсің. Өміріңде үлкен өзгеріс жасауға шешім қабылдамас бұрын, қалаңда саған осындай жұмыс ұсына алатын компаниялар бар-жоғын біліп алғаның жөн.
Өз бетіңше жұмыс істегің келе ме? Онда жеке іс бастамас бұрын шағын зерттеу жүргіз. Бұл сенің қызметіңе сұраныс барын түсінуге көмектеседі. Осылайша табысқа жету мүмкіндігіңді таразылап, алда күтіп тұрған өзгерістерге шынымен дайын екеніңді түсіне аласың.
3. Қаржылық қажеттіліктер
Мүмкін сен қазіргі жұмысыңнан қатты шаршаған шығарсың. Сол себепті несиелерің немесе басқа қаржылық міндеттемелерің болса да, бәрін тастап, жаңа жұмыс іздегің келетін шығар. Бірақ түбегейлі шешім қабылдамас бұрын барлық артықшылықтар мен тәуекелдерді таразылап алған дұрыс.
Өз шығындарыңды, табыстарыңды және жинаған ақшаңды есепте. Егер өзіңді іздеу мен жаңа мамандық табу бірнеше айға созылып кетсе, қолыңдағы қаражат жеткілікті ме — соны анықта.
Мүмкін қысқартуға болатын шығындарың бар шығар? Ал ай сайын пәтерге, тамаққа және үнемдей алмайтын басқа қажеттіліктерге қанша ақша кетеді?
Қаржылық мүмкіндіктеріңді нақты бағалаған соң, дәл қазір мамандық ауыстыруға қолайлы уақыт па, әлде бұл жоспарды кейінге қалдырған дұрыс па — соны түсінесің. Кейде үлкен өзгерістерге бармас бұрын жақсылап дайындалған жөн.
4. Сенің тұлғалық типің
Жаңа мамандық таңдағанда ескеру керек ең маңызды факторлардың бірі — тұлғалық тип. Адамның мінез-құлқы мен тұлғалық ерекшеліктері өмірдің көптеген саласына әсер етеді.
Мысалы, егер сен интроверт болсаң, адамдармен үнемі қарым-қатынасты талап ететін мамандықта ұзақ уақыт жұмыс істеу қиын болуы мүмкін. Ал экстраверт адамға керісінше, үйден жұмыс істеу немесе ерекше төзімділік пен табандылықты қажет ететін істермен айналысу қиындық туғызуы ықтимал.
Сонымен қатар өз құндылықтарыңды да анықтап алғаның маңызды. Егер жаңа жұмыста сол құндылықтарыңа қайшы келетін істерді жасауға тура келсе, кейін үлкен өзгеріске барғаныңа өкініп қалуың мүмкін.
Сондықтан өзіңмен шынайы әңгіме жүргізуге уақыт бөл. Негізгі өмірлік құндылықтарыңды және сен үшін мүлде қабылданбайтын нәрселерді қағазға жазып қой. Қызықтырған бос жұмыс орындарын зерттеген кезде сол тізімді жаныңда ұстасаң, дұрыс шешім қабылдауға көмектеседі.
5. Басқа адамдардың тәжірибесі
Жаңа мамандыққа ауысуды ойлағанда, бұл жолдан бұрын өткен адамдардың тәжірибесін зерттеу пайдалы. Олардың қандай қиындықтарға тап болғанын, қандай қателіктер жібергенін және табысқа қалай жеткенін білу саған дұрыс бағыт таңдауға көмектеседі.
Мұндай ақпаратты сұхбаттардан, блогтардан, кәсіби форумдардан немесе әлеуметтік желілерден табуға болады. Басқалардың тәжірибесі жаңа салаға бейімделу процесін жеңілдетуі мүмкін.
Фото: Pexels
Дереккөз: HEROINE
