Астана қаласы сотының баспасөз қызметі хабарлағандай, 2025 жылдың 5 қыркүйегінде сағат 10:30-да елорданың мамандандырылған ауданаралық әкімшілік құқық бұзушылықтар жөніндегі сотында блогер Жанабыловқа (ЖК «ЭЛЁР») қатысты іс қаралады.
Уәкілетті органдардың мәліметінше, ол Instagram-дағы «zhanabylov_e» парақшасы арқылы автокөліктер, ақша және бағалы сыйлықтар ойнатып отырған. Бұл әрекет заңсыз лотерея ретінде бағаланған. Ұтысқа қатысу үшін жазылушылар 30 000 теңге төлеп, ТОО «Zhana Busunes» ұсынған «оқыту курстарына» жазылған.
8–21 тамыз аралығында Ерболат Жанабылов пен Эльмира Төлегенова 11 автокөліктің ұтысын жариялаған. Қатысушылар тікелей эфир күткен, алайда оларға құны 30 мың теңге тұратын ақылы оқыту курсына сілтеме көрсетілген. Ұтысқа қатысу құқығы тек курс сатып алғандарға ғана берілген. Бұл қоғамда үлкен сынға ұшырап, мемлекеттік органдарға шағым түсірілді. Туризм және спорт министрлігі «ұтыс ойындарын өткізуге және лотерея билеттерін таратуды тек ресми ұйымдастырушылар мен агенттер ғана жүзеге асыра алады» деп ескертті.
Ерболат Жанабыловқа қатысты Әкімшілік құқық бұзушылық туралы кодекстің 445-1-бабы, 6-бөлігі бойынша (лотерея қызметі туралы заңнаманы бұзу белгілері) әкімшілік хаттама толтырылған.
Жанабыловтың адвокатының айтуынша, іс материалдары сотқа жолданды. Ал оның жұбайы Эльмира Төлегеноваға қатысты тексеріс жалғасып жатыр.
Министрлік азаматтарды «күмәнді гивтерге қатыспауға» шақырды.
Фото: Instagram
Дереккөз: Tengrinews
