Кітаптың атауы — «Оның аты Салтанат еді».
Қазіргі таңда әлеуметтік желілерде кітаптың алғашқы 15 беті оқуға қолжетімді. Видеоүндеуінде Айтбек кітапта болған оқиғалардың хронологиясын қалпына келтіріп, отбасы ішіндегі қарым-қатынастарды және олардың бірігіп, қылмыскердің әділ жазасын алуына қалай қол жеткізгенін егжей-тегжейлі сипаттағанын айтты.
Ол Салтанаттың есімі зорлық-зомбылық құрбанының символы ғана емес, сонымен бірге әділ жазаның бейнесіне айналғанын еске салды.
«Бұл кітап — ауыр қасіреттен, күйзелістен, жүрек тоқтаған сәттерден, өмірдің “дейін” және “кейін” болып екіге бөлінген кезеңінен туған. Ол нақты оқиғаларға — ТМД аумағындағы ең резонансты сот процесіне негізделген. Көп адамдар үшін 9 қараша жай күн емес. Бұл — бәріміздің жүрегімізге жақын, бірақ танымайтын бір адамның қазасын бірге сезінген күн. Кітап — шынайы. Онда менің сезімдерім, ең ауыр күндерім мен ұйқысыз түндерім, қорқынышым, ашуым және ең бастысы — махаббатым бар», —
дейді Айтбек.
Айтбек Амангелді қайғылы оқиғадан кейін қоғамнан оқшауланып, сурет жарияламауға, сұхбат бермеуге бел буғанын айтады. Бірақ халықтың қолдауын көріп, бұл — тек олардың отбасының ғана емес, бүкіл елдің қасіреті екенін түсінген соң, кітап жазуға шешім қабылдаған.
«Кітапты жазу барысында мен бәрін қайта бастан кештім — әр минутты, әр жаңалықты, әр көзқарасты. Ол кезде тоқтап, тыныстап, не болып жатқанын ұғынуға уақыт болмады. Кітап мен үшін сол тоқтау нүктесі болды. Мен сенемін: бұл кітапты оқыған әр адам өз жақындарына көз жүгіртіп, хабарласып, “мен сені жақсы көрем” деп айтқысы келеді. Болмаса, жай ғана құшақтайды. Қайғылы оқиғадан кейін маған мыңдаған хат келді, сол кезде мен қаншама адамның жылы сөз бен қолдауға зәру екенін түсіндім», —
дейді ол.
Айтбек Амангелді кітапты 2024 жылдың маусым айында жаза бастаған. Ал бастапқы жоспар бойынша желтоқсанда аяқтауы тиіс болғанымен, жұмысты 2025 жылдың наурызында ғана тәмамдаған.
Фото: Instagram
