Өткен жаздың басты тренді трикотаж болды — инфлюенсерлер одан жасалған түрлі заттарды сатып алып, көктем-жаз топтамаларында тоқымадан тігілген жеңіл топтар да пайда болды. Ал күзге келгенде ең сәнді мата орнын күдері басты. Одан тігілген кез келген киім образға бірден сәнді реңк береді. Ендеше, гардеробқа міндетті түрде енуі тиіс күдері бұйымдарын қарастырайық.
Күдеріден жасалған қандай киім сәнде?
Қазір ең танымал күдері бұйымдарының бірі — жакеттер. Ауа райы салқындап үлгермеген шақта олар сыртқы киімнің орнын басады, ал кейінірек пәлте не күртешенің ішінен киюге болады. Негізгі ереже — тік пішінді таңдау. Белді қысып тұратын нұсқалар пропорцияны бұзады. Басқасы сенің талғамыңа байланысты: мысалы, орта жамбастан келетін ағылшын жағалы пенжек немесе жамбастың жоғарғы тұсына дейінгі дөңгелек ойық жағалы жакет.
Егер мұндай қалыңдау киім ыңғайсыз көрінсе, күдері белдемше мен шалбарға назар аудар. Белдемшелердің ең танымалы — тізеге дейінгі тік пішін. Балтырға дейінгі нұсқалар да жарайды. Ал мини таңдағанда абай болу қажет — сәнде тек А-силуэт үлгілер бар. Шалбарға келсек, олар да тар болмауы керек.
Алайда ең үлкен танымалдыққа күдері сыртқы киім ие. Ультратрендтегі — күдері күрте. Олар әлдеқашан былғары күртешелерді алмастырды. Таңдау қағидасы да бұрынғыдай: сәнде — орта жамбастан келетін кең пішінді, жағалы үлгілер. Сонымен қатар күдері ұзын сырт киімдер де трендте. Оның үстіне тек белбеулі классикалық тренчпен шектелмей, А-силуэтті модельдерге де тоқталуға болады.
Фото: Instagram
Дереккөз: Grazia
