Ұзақ уақыт бойы гардеробымызда біртүсті жейделер ғана болды. Кейін оларға қарапайым принттері бар нұсқалар қосылды. Ал торкөз жейделерді біз біраз уақыт ұмытып кеткендейміз: 2010-жылдардың ортасында танымалдық шыңына жеткеннен кейін олар біртіндеп антитрендке айналған еді. Алайда 2026 жылы бұл модельдер қайтадан гардеробымызға оралып, сәнді образдардың ажырамас бөлігі болуға дайын.
Ең алдымен пішінін дұрыс таңдаған жөн. Торкөз жейделер жұмыс стилінің эстетикасын еске салатындықтан, олар барынша еркін пішімде болғаны дұрыс. Тік силуэтті, кеңдеу модельдерге басымдық бер. Бұл жағдайда белі жиырылған тренд нұсқалардан бас тартқан жөн, өйткені ірі принт дене пропорциясын бұрмалап көрсетуі мүмкін. Сондай-ақ декормен де артық тәжірибе жасамаған дұрыс: асимметриялық бөлшектер мен аппликациялар қажет емес, себебі өрнектің өзі-ақ киімге әсерлі сипат береді.
Ал мата таңдауда еркіндік бар. Кез келген образға оңай үйлесетін ең танымал нұсқа — мақта матадан тігілген жейделер. Егер сен босаң әрі жайлы стильді ұнатсаң, қалың матадан жасалған модельдерге де назар аударуға болады. Мысалы, жүн немесе фланель жейделер. Айтпақшы, олар осы маусымда трендке айналған қала сыртындағы өмір эстетикасын еске түсіреді.
Принт таңдауда да шектеу аз. Торкөздің кез келген түрі жарай береді: тартаннан бастап гленчекке дейін. Сонымен қатар барлық өлшемдегі «шаршылар» өзекті — көзге әрең байқалатын ұсақ тордан бастап, өте ірі үлгілерге дейін. Ең әмбебап түстік үйлесімдер — көк пен ақтың комбинациясы немесе қызылдың ашық реңктермен үйлесуі. Дегенмен пастельді немесе сәндегі ашық түстер араласқан жейделерден де қорықпа: олар да биылғы тренд қатарында.
Фото: Instagram
Дереккөз: Grazia
