Ең жақсы нәтижеге жету үшін алдымен тері реңкін және сыртқы келбет ерекшеліктерін анықтау қажет. Мұны қалай жасау керектігін төменде егжей-тегжейлі түсіндіреміз.
Тері астар реңкін анықта
Терінің астар реңкі — бұл күнге күюге, жыл мезгіліне немесе күтімге байланысты өзгермейтін ішкі реңк. Ол жылы, суық немесе бейтарап болуы мүмкін және қандай түстердің бетіңді сергек әрі үйлесімді көрсететінін айқындайды.
Көпшілік тек терінің ашықтығына мән береді, алайда бұл — қате. Өте ашық терінің өзі жылы астарға ие болуы мүмкін, ал қоңырқай теріде суық астар кездеседі. Түстер дұрыс таңдалса, тері біркелкі көрінеді, көз жарқырайды, ал жалпы образ жинақы болады.
Ал сәйкес келмейтін реңктер бет-әлпетті шаршаңқы, сұрғылт етіп көрсетуі мүмкін, қызарулар мен көз астындағы қара дақтар айқынырақ байқалады. Сондықтан астар реңкін анықтау — киім, макияж және әшекей таңдаудың негізі.
Тамыр түсіне назар аудар
Астар реңкті анықтаудың ең оңай тәсілдерінің бірі — білегіңнің ішкі жағындағы тамырларға күндізгі жарықта қарау. Жасанды жарық түсті бұрмалауы мүмкін, сондықтан мұны терезе жанында жасаған дұрыс.
Егер тамырлар көк немесе күлгін болып көрінсе — терінің астары суық. Жасылдау реңк жылы астарды білдіреді. Ал нақты ажырату қиын болса, астар бейтарап болуы ықтимал.
Алтын мен күміске реакцияны тексер
Әшекейлер саған қандай түстер үйлесетінін көрсетіп бере алады. Кезекпен алтын және күміс әшекейді тағып көр немесе бетіңе жақын ұстап байқа. Терінің қалай көрінетініне назар аудар: сергек, жарқын, біркелкі болып көріне ме?
Егер алтын терінің жылылығын айқындап, образды жұмсақ етсе — астар жылы. Ал күміс бетті сергітіп, бет пішінін айқындаса — суық астар белгісі. Бейтарап астарда екі металл да жарасымды көрінеді.
Ақ пен сүт түстес реңкті салыстыр
Ақ түс әртүрлі болады, оны іс жүзінде оңай тексеруге болады. Таза ақ және сүт түстес (айвори, крем) киімді кезекпен бетіңе жақын ұстап көр.
Суық астар көбіне ашық аппақ түспен жақсы үйлеседі — тері таза әрі сергек көрінеді. Жылы астар жұмсақ, крем реңктермен әдемі үйлеседі, ал тым аппақ түс сарғыштықты немесе шаршаңқылықты айқындауы мүмкін.
Егер екі нұсқа да бірдей жарасса — астар бейтарап. Бұл тест бетке жақын орналасатын базалық киімдерді таңдауда пайдалы.
Терінің күнге реакциясын бағала
Жылы астары бар адамдар әдетте тез әрі жеңіл күйіп, алтын түске енеді. Суық астарлы тері жиі қызарып, тез күйіп кетеді, ал қоңырлану баяу жүреді немесе қызғылт реңк береді.
Дегенмен бұл белгіні жеке қолдануға болмайды, себебі күнге реакция тері типіне де байланысты. Басқа тәсілдермен бірге қарастырғанда ғана нақты нәтиже береді.
Көз түсіне мән бер
Көз түсі қандай реңктердің саған үйлесетінін меңзей алады. Сұр, көк, ашық жасыл секілді салқын көз түстері көбіне суық астармен үйлеседі.
Қоңыр, жаңғақ түстес және жылы жасыл көздер жиі жылы астармен байланысты. Бұл ретте тек негізгі түсті емес, ішкі реңктер мен ұсақ дақтарды да ескерген жөн.
Табиғи шаш түсін талда
Шаштың табиғи түсі де тері астарымен байланысты болуы мүмкін. Күлгін реңкті, платина, суық қоңыр-сарғыш түстер әдетте суық астарға тән.
Алтын, мыс, жирен реңктер жылы астарды білдіреді. Егер шаш түсінен айқын реңк ажырату қиын болса, астар бейтарап болуы мүмкін. Мұнда боялған емес, дәл табиғи түсті ескерген маңызды, өйткені бояу визуалды әсерді толық өзгерте алады.
Ережелерді бейімдеуге болатынын ұмытпа
Белгілі бір түс «жараспайды» деп саналса да, оны образға сәтті енгізуге болады. Макияж, әшекейлер және реңктердің дұрыс үйлесімі көп нәрсені өзгертеді. Мысалы, түсті беттен алысырақ орналастыруға немесе басқа реңктермен теңестіруге болады. Матаның құрылымы мен киім пішімі де маңызды рөл атқарады.
Ең бастысы — тек ережеге емес, өз жайлылығыңа және айнадағы көрініске сүйену.
Фото: Pexels
Дереккөз: HEROINE
