Дұрыс тамақтану — осы уақытта ағзаны қолдаудың ең қарапайым әрі қолжетімді тәсілдерінің бірі. Табиғи қабынуға қарсы және босаңсытатын әсері бар өнімдер туралы төменнен оқи аласың.
1. Банан
Банандар магний мен калийге бай. Бұл минералдар бұлшықеттерді босаңсытып, жатырдың жиырылу қарқындылығын азайтуға көмектеседі. Сонымен қатар банан құрамындағы B6 дәрумені жүйке жүйесінің жұмысын реттеп, ашушаңдықты төмендетеді.
Бананды күннің бірінші жартысында жеген дұрыс немесе ботқа мен смузиге қосуға болады. Бұл күні бойы энергия деңгейін бірқалыпты сақтауға көмектеседі.
2. Қара шоколад
Сапалы қара шоколад — магнийдің көзі. Ол бұлшықеттерді босаңсытып, ауырсыну сезімін азайтады. Шоколад құрамындағы флавоноидтар қан айналымын жақсартады, ал кофеин мен теобромин шаршаумен күресуге көмектеседі.
Құрамында кемінде 70% какао бар және қант мөлшері аз шоколадты таңда. Ұсынылатын мөлшер — күніне 20–30 грамм.
3. Сұлы ботқасы
Сұлы ботқасы күрделі көмірсуларға бай, олар қандағы қант деңгейін тұрақты ұстап, тәттіге деген құмарлықты азайтады. Магний мен мырыш түйілуді бәсеңдетсе, талшық іштің кебуін азайтады.
Ең пайдалысы — тұтас сұлы үлпектері. Ботқаны суға немесе өсімдік сүтіне пісіріп, үстіне банан, жаңғақ немесе жидек қосуға болады.
4. Албырт балығы
Жаңа піскен албырт балық омега-3 май қышқылдарына бай. Олар қабынуды азайтып, етеккір кезіндегі ауырсынуды едәуір төмендетеді. Сонымен қатар балықта гормондық тепе-теңдікті сақтауға және тіндердің қалпына келуіне қажетті D дәрумені мен ақуыз бар.
Еті тығыз, өткір иісі жоқ жаңа немесе мұздатылған балықты таңда. Пайдалы қасиеттерін сақтау үшін буға пісіріп, пеште қақтап немесе баяу бұқтырып дайындаған дұрыс.
5. Авокадо
Авокадо пайдалы қанықпаған майларға және B6 дәруменіне бай. Бұл дәрумен түйілуді азайтып, жүйке жүйесін қолдайды. Сонымен қатар оның құрамындағы магний іштің кебуін азайтып, қандағы қант деңгейін тұрақтандыруға көмектеседі.
Сыртқы қабығын басқанда сәл жұмсақ авокадоны таңда. Оны салатқа, тостқа қосуға немесе жұмыртқамен бірге жеуге болады.
6. Түймедақ шайы
Түймедақ құрамындағы флавоноидтар бұлшықеттерді босаңсытып, түйілуді азайтады. Сонымен қатар бұл шай мазасыздықты төмендетіп, ұйқы сапасын жақсартады.
Хош иістендіргішсіз сүзбе-пакеттегі немесе үгілмелі түймедақ шайын пайдалан. Ұйықтар алдында бір стақан ішу барынша босаңсуға көмектеседі.
7. Жаңғақтар
Бадам мен грек жаңғағы магнийге, омега-3 май қышқылдарына және Е дәруменіне бай. Олар қабынуды азайтып, бұлшықеттерді босаңсытады. Сондай-ақ энергия деңгейін қолдап, тәттіге деген құмарлықты төмендетеді.
Фото: Pexels
Дереккөз: HEROINE
