Қазақстанда коронавирусқа байланысты шектеулер енгізу медициналық мекемелердің жүктемесіне байланысты болады. Бұл туралы Денсаулық сақтау министрлігінде хабарлады.
Бүкіл әлемде COVID-19 жаңа штаммы — «Пирола» таралуда. Бұл «Омикронның» мутацияға ұшыраған кіші түрі. Жұқтырғандардың саны күн санап артып келеді.
Денсаулық сақтау министрлігінің хабарлауынша, «Пирроланың» таралуына қарамастан, бүгінгі күні Қазақстан қандай да бір шектеулер енгізуді жоспарламаған.
«Шектеу шараларын енгізу Денсаулық сақтау жүйесіне жүктемені ескере отырып, 100 мың тұрғынға шаққандағы төсек-орынның көрсеткішіне және R репродукция коэффициентіне негізделген эпидемиологиялық жағдай матрицасына сәйкес қарастырылған»,
делінген Денсаулық сақтау министрлігінің жауабында.
Бүгінгі таңда қазақстандықтарға коронавирустан қорғау үшін қытайлық Vero cell (Sinopharm) және американдық Pfizer вакциналары қолжетімді. Олардың барлығы «коронавирустың ауыр жағдайларының алдын алуда бірдей қауіпсіз және тиімді». COVID-19 вакцинациясы тегін.
«КВИ-ге қарсы вакцина өндірушілер коронавирус штаммдарының мутацияларына тұрақты мониторинг жүргізеді және вирустың жаңа штамдарына қарсы вакциналардың тиімділігін зерттейді»,
деп қосты Денсаулық сақтау министрлігі.
Қай медициналық мекемелерде қажетті вакцина бар екенін қаланың және тұрғылықты аймақтың денсаулық сақтау басқармасынан білуге болады.
Қыркүйек айында Денсаулық сақтау министрлігінің санитарлық-эпидемиологиялық бақылау комитеті Қазақстанда «Пирола» коронавирусының жаңа штаммымен инфекциялар анықталмағанын хабарлады.
Ғалымдардың пікірінше, «Пирола» вирус жұқтырған немесе вакцинацияланған адамдар үшін ерекше қауіп төндіреді. Ол мутациялардың көп болуына байланысты препараттарға төзімді. Қазіргі уақытта ең көп таралған коронавирустың басқа штамдары сияқты, «Пирола» белгілері әдеттегі суық тиюге ұқсас.
Комитет түсіндіргендей, «Эрис» («Омикронның» ұқсас кіші түрлері) және «Пирола» белгілері «Омикронның» басқа нұсқаларымен бірдей. Оларға қызу көтерілу, жөтел және шаршау, мұрыннан су ағу, бас ауруы және бұлшықет ауруы жатады.
Тамыз айында Дүниежүзілік денсаулық сақтау ұйымы (ДДҰ) әлемде COVID-19 ауруы бір айда бірден 80 пайызға өскенін хабарлады. Осы кезеңде 1,5 миллионға жуық жаңа COVID-19 жағдайлары және 2500-ден астам өлім тіркелді.
Шетелдік БАҚ-тың хабарлауынша, Францияда «Пирола» штаммымен инфекцияның алғашқы жағдайлары 2023 жылдың тамызында анықталған. Кейінірек коронавирустың жаңа штаммы он елде пайда болғаны белгілі болды. Негізінен Батыс Еуропада, Африкада және Солтүстік Америкада.
Ресейлік ғалым адамзатқа осы жылдың мамыр айында ресми түрде аяқталған пандемияның жаңа толқынын күту керек пе деген сұраққа жауап берді. Ресейдегі «Вектор» мемлекеттік ғылыми орталығының молекулалық вирусология бөлімінің меңгерушісі Валерий Локтев ірі пандемиясыз кезең шамамен 30 жылға созылатынын айтты.
Ақпарат көзі: Tengri News
Фото: Unsplash
