Instagram: @jennierubyjane
BLACKPINK тобының мүшесі Дженни Коян қаласында өткен концерт кезінде қызметкерлермен болған әрекеті арқылы көпшілікті таң қалдырды.
Топ екі күн қатарынан Коян стадионында аншлагпен концерттерін өткізді. Шараға қарапайым жанкүйерлермен қатар, танымал тұлғалар да қатысты. Кеш барысында «Jump» атты жаңа трек таныстырылды.
Күткендей, шоу кезінде бірнеше ерекше сәттер орын алды, соның бірі Дженнимен байланысты болды. «Forever Young» әнін орындау барысында оның аяқ киімімен мәселе туындап, бұл қойылымға әсер етті. Топтың басқа мүшелері жағдайға тез бейімделіп, орын алған оқиғаны білдіртпеуге тырысты.
Желіде тараған видеода Дженнидің сахна сыртындағы қызметкерлермен қалай сөйлескенін көруге болады. Ол аяқ киімнің бауын қалай байлау керектігін көрсетіп, тез әрі қобалжулы әрекет еткен. Бұл сәтті көрген кейбір желі қолданушылары Дженниді дөрекілік танытты деп айыптап, видеоны тарата бастады.
X әлеуметтік желісінде Дженниге қатысты көптеген сыни және балағат пікірлер жарияланды:
«Бұл қыз кім өзі, өзін бұлай ұстауға қалай батылы жетеді?», «Ол әрдайым қызметкерлермен осылай сөйлеседі», «Онда бәрін өзі істесін, олар барынша көмектесіп жатыр, ал ол тұрып алып айқайлап жатыр», «Егер істегендері ұнамаса – өзің істе! Міндетті түрде айқайлаудың қажеті жоқ!».
Instagram: @jennierubyjane
Дегенмен, Дженнидің жанкүйерлері оны қорғап, әншінің әрекетінде ешқандай дөрекілік болмағанын, тек тез әрі нақты көрсетуге тырысқанын алға тартты. Олар, сондай-ақ, видеоны контекстен бөліп алған деп есептейді.
«Бейнежазбаны әдейі қиып, оны дөрекі етіп көрсетіп отырсыңдар ма? Жалпы… өздеріңнен көріңдер», «Басқа ракурстан оның күлімдеп, қызметкерлермен сөйлесіп тұрғаны көрінеді», «Сахнадағы дыбыс өте қатты болды, ал қызметкерлер құлаққаппен жүрген – сол себепті қозғалысы мен мимикасы қатты көрінген», «Алдымен өзі аяқ киімді түзетпек болды, бірақ қызметкерлер өздері көмекке келді, өйткені олардың міндеті – Дженниге ән айтуға толық көңіл бөлуге мүмкіндік беру», – деп жазды олар.
Фото: Instagram
Дереккөз: TheGirl
