Биыл классикалық біртұтас түстерге қарағанда көлденең жолақты үлгілер алдыңғы қатарға шықты. Мұндай жемпірлер әмбебаптығын сақтай отырып, образға бірден сәнділік береді.
Кең немесе түзу силуэттегі түрлері өзекті. Иә, бұл маусымда денеге қонымды трикотаж да сәнде, бірақ жолақты принтпен бірге ол дене пропорциясын бұрмалауы мүмкін. Ең қолайлы ұзындық — жамбас тұсына дейін немесе санның ортасына дейінгі нұсқалар. Ал қысқа түрлерінен аулақ болған жөн: оларды күз-қыс киім үлгісіне үйлестіру қиын. Иық сызығы табиғи пішінге сай немесе сәл түсірілген болуы мүмкін.
Жаға пішінін таңдағанда жеке стиль мен киім үйлесіміне мән бер. Ең әмбебап нұсқа — дөңгелек ойынды. Егер жемпірді жейде немесе поло стиліндегі лонгсливпен үйлестіргің келсе, V-пішінді жаға мінсіз жарайды. Ал заманауи трендтерді ұстанғың келсе, қайырма жағалы нұсқаларға назар аудар.
Табиғи талшықтар бірінші орында: жұмсақ кашемир, жылы меринос жүні немесе ауадай жеңіл мохер. Сондай-ақ, полиэстер мен эластан қосылған қоспа жіптер де төзімділігімен ерекшеленеді. Негізгі назарды тоқыма сапасына аудар — матасы тегіс, тігістері ұқыпты болуы тиіс. Синтетикасы басым жемпірлер ерекше күтімді қажет етеді: оларды төмен температурада, арнайы тор қапшықта, баяу айналыммен жуу керек.
Жемпірге жарасымды кез келген түстік үйлесімді таңдауға болады — мысалы, сұр мен кілегей түстері немесе шоколад пен көк реңктердің қосындысы. Классикалық нұсқаларға ақ және қара жолақты үлгілер жатады — олар кез келген киіммен жақсы үйлеседі. Қызыл және көк түстердің әртүрлі үйлесімдері де өзектілігін жоғалтпайды. Егер киіміңе жарқын акцент қосқың келсе, батыл түстер дуэтін байқап көр: қызғылт пен ашық жасыл, күлгін мен лимон, қою қызыл мен көк немесе қызғылт сары мен хаки. Ал мұндай тәжірибелер саған жақын болмаса, бір-біріне ұқсас екі реңкті үйлестірген принттерге назар аудар — бұл жағдайда жолақтар көзге қатты түспейді. Мұндай шешім сұр, беж, шоколад, терракота немесе жасыл түстердің реңктерімен тамаша көрінеді.
Мұндай жемпірде декор минималды әрі функционалды болуы керек. Төменгі жағындағы кең резеңке немесе сәл асимметриялы пішін жарайды. Дегенмен кейде ең дұрыс шешім — декордан бас тартып, әшекейлерге басымдық беру. Белді сәнді белдіктермен айқындауға немесе жолақ түске үйлесетін галстук тағуға болады.
Фото: Instagram
Дереккөз: Grazia
