Instagram: @zeboyijahonsinger
Өзбекстанның Самарқанд облысында Zeboyi Jahon деген сахналық есіммен танымал болған әнші Зебинисо Носирова өлі күйінде табылды. Бұл қылмысқа оның күйеуі күдікті ретінде танылып отыр.
Қайғылы оқиға туралы Milliy TV телеарнасының Millar бағдарламасы хабарлады. Ақпаратқа сәйкес, қанды оқиға 26 шілдеде орын алған.
Gazeta.uz басылымының мәліметінше, тергеу барысында басты күдікті — қаза тапқан әншінің күйеуі екені анықталған.
Тергеу нұсқасына сәйкес, ер адам Зебинисоға балаларын көруге келген. Сол кезде екеуінің арасында жанжал туындап, нәтижесінде ер адам әйелін қолымен буындырып өлтірген. Әнші оқиға орнында көз жұмған.
«Менің қарындасым мұндай өлімге лайық емес еді. Сол күні мен жұмыста болдым, жедел жәрдем қызметінде істеймін. Сағат шамамен 4-те әйелім хабарласып, қарындасыма бірдеңе болғанын айтты. Анамды іздедім — ол: «Шұғыл кел, оны өлтіріп кетті», — деді. Өз әйелі мен үш баласының анасына қалай осылай жасауға болады?»,
дейді марқұмның ағасы.
Ол қарындасын өлтірген адамға ең қатаң жаза тағайындауды сұрайды.
БАҚ өкілдеріне берген мәліметінде Өзбекстан Бас прокуратурасы 1992 жылы туған ер адамның ұсталғанын хабарлады. Оған қатысты Қылмыстық кодекстің 97-бабының 1-бөлігі бойынша (қасақана адам өлтіру) іс қозғалған.
Қаза тапқан әншінің жасы 33-те еді. Артында үш баласы қалды.
Фото: Instagram
