Instagram: @yerlan.aliyev
Көбейтұз көлінде туристер жаппай қызғылт тұз қазып алып жатыр. Мұндай жағдай бес жыл бұрын да қайталанған болатын.
Әлеуметтік желілерде Көбейтұз көліне қатысты вандализм фактісі туралы ақпарат кеңінен тарауда — демалушылар көлден шелек-шелек тұз алып кетіп жатыр. Бұл мәліметті Ақмола облысы Ерейментау ауданының полиция департаментінің баспасөз қызметі растады.
«Полиция департаменті Көбейтұз көлінде табиғатты қорғау заңнамасының бұзылғанын тіркегенін хабарлайды. Қазіргі уақытта заң бұзушыларды анықтап, оларды жауапқа тарту шаралары жүргізіліп жатыр»,
делінген хабарламада.
Көбейтұз — тұйық, тұзды көл, ол Ақмола облысында орналасқан және ерекше табиғи құбылыстарымен танымал. Көлдің қызғылт түске боялуы сирек кездесетін құбылыс. Бұл — жоғары тұздылық пен ыстықта Dunaliella salina деп аталатын микробалдырдың қызғылт пигмент бөлуімен байланысты. Әлемде мұндай қасиетке ие тек сегізге жуық көл ғана бар. Солардың бірі – Көбейтұз, ол бірегей табиғи нысан ретінде бағаланады.
Айта кетейік, көл 2020 жылы карантин уақытында ерекше танымалдылыққа ие болды. Сол кезде ол жай ғана әдемі фото түсіретін орын ғана емес, қызғылт тұзының емдік қасиеті бар деген аңыздарға байланысты туристердің назарын өзіне аударған еді. Салдарынан адамдар көлдің тұзын да, балшығын да шелекпен қазып алып, кейін оны саудалаған. Бұл әрекеттер көлдің табиғи құрылымына зиян келтіріп, оның бетінде көптеген қара шұңқырлардың пайда болуына себеп болды. Осыдан кейін Көбейтұзға баруға және суға түсуге тыйым салынған болатын.
Фото: Instagram
Дереккөз: NewTimes
