Pexels: Pavel Danilyuk
Егер сен бой жетіп, өз бетіңше шешім қабылдай алатын болсаң, кіммен қарым-қатынас құру керектігін өзің шешуге толық құқығың бар. Алайда кейде ата-анаң бұл таңдауыңа сын айтып, күмән келтіріп, тіпті ашық қарсылық танытуы мүмкін.
Бұл жағдайдың себебі неде болуы мүмкін және оны қалай шешуге болады? Осыны бірге қарастырайық.
Неге ата-анаң сенің таңдауыңды құптамайды?
1. Ата-аналық шамадан тыс қамқорлық
Егер ата-анаң үнемі саған шамадан тыс қамқорлық танытып келсе, олар сенің өскеніңді мойындауға қиналуы мүмкін. Сен отыздан ассаң да, олар сені әлі де қорғауды қажет ететін кішкентай қыз ретінде қабылдайды. Олар үшін сенің өміріңде бөтен бір ер адамның тұрақтылық пен қауіпсіздік бере алатынына сену қиын.
2. Құндылықтар мен көзқарастардың айырмашылығы
Сен үшін — махаббат пен еркіндік белгісі болып көрінетін нәрсе, үлкендер үшін жауапкершіліктің жоқтығы немесе жеңілтектік болып сезілуі мүмкін. Мысалы, сен шетелдік азаматпен кездесіп жүрсең, азаматтық некеде өмір сүріп жатсаң немесе бала сүюді жоспарламасаң, олар мұны қабылдай алмауы мүмкін.
3. Өз тәжірибесін сен арқылы қайта бастан кешіру
Ата-анаң өз өміріндегі сәтсіз қарым-қатынастарды сенің өміріңе проекциялауы да ықтимал. Мысалы, анаң жағымсыз некеде өмір сүрген болса, сенің сүйіктің бұрынғы күйеуіне ұқсап қалса, ол күдікпен қарай бастайды. Ал әкең қатал ортада өскен болса, болашақ күйеуіңнен жоғары білім, жақсы жалақы және мінсіз бедел талап етуі мүмкін.
Ата-анаң қарым-қатынасыңа қарсы болса, не істеу керек?
1. Сабыр сақта
Эмоцияға ерік берме. Егер ата-анаң ренішін жиі білдірсе, оларға айқаймен жауап қайтарма. «Бұл менің өмірім, мен шешемін!» деген сияқты сөздер жағдайды ушықтырып жібереді. Оның орнына сабырмен, «Сіздер сабырға келгенде, әңгімелесуге дайын боламын» деп айт.
2. Оларды жігітіңмен таныстыр
Кейде олардың қарсылығы — жалған ақпарат пен таптаурындардың салдары. Бейтарап жерде кездесу ұйымдастыр. Бір сағаттық ашық әңгіме бәрін өзгертуі мүмкін. Мүмкін, олар сүйіктіңнің қандай адам екенін өз көздерімен көргенде пікірін өзгертетін шығар.
3. Сынды манипуляциядан ажырата біл
Егер анаң сүйіктіңнің жұмыс істемей жүргенін айтып уайымдаса — бұл ақылға қонымды сын, оны талқылауға болады. Бірақ «Не ол, не біз!» десе — бұл қысым және сенің шекараңа қол сұғу. Бұған жауап берудің орнына, өзіңнің жеке шешімдерге құқығың бар екенін анық айт.
4. Бақытты екеніңді көрсет
Ата-анаң ең алдымен сенің бақытты болғаныңды қалайды. Егер олар сенің қарым-қатынаста жарқын, сенімді, бақытты болып жүргеніңді көрсе, біртіндеп қарсылықтарын қояды. Олар уайымдаудың қажеті жоқ екенін түсінеді.
6. Өз сезіміңді тыңда
Егер қарым-қатынасыңда күйзеліс пен ауырлық көбірек болса — бұл алаңдауға себеп. Ата-анаң босқа уайымдамайды. Егер сүйіктің ішімдікке тәуелді, агрессивті, қаржылық алаяқтықпен айналысатын немесе саған опасыздық жасайтын болса, ондай адаммен болу — өзіңе жасалған әділетсіздік. Ондай қарым-қатынасты жалғастырма.
Фото: Pexels
Дереккөз: HEROINE
